Bluelluz o Aladino y los cuarenta suaños robaos
El pote taba saláu. Una escusa, solo una pa
sacar el so rellumante xeniu a pasiar pola casa. Y nun yera precisamente un
xeniu azul Disney, yera más bien colloráu avernu, cornín y con un rabu llargu
ya peludu enllenu de pinchos furruñosos. Nun viaxaba n'alfombres damasquinaes
nin siquiera del Ikea, anque si producía vientu, polvu y fumu a esgaya que facía
orpinar. Y como bon xeniu, tamién tenía daqué de magu, yera capaz de correxir
el color de los güeyos ensin ayuda del Photoshop, solo con afalagos.
L’amor primaveral tiñíu de lluz azul, tornose
en costume, más tarde en plomizu aburrimientu y nun momentu difícil
d'establecer, n'espantu. L’esganu campó por los pasiellos y les habitaciones,
los cristales llancíen, los pexes de colorinos decidieron saltar al vaciu y nun
aguantar más aquella tensión que los afogaba dentro’l agua. Hamelín, el gatu
Bengala, fuxó pola tronera del desván llevándo con él arañes, coroyos ya
cucaraches. El silenciu fízose’l amu del espaciu y les trés almes, la del xeniu
y les dos humanes, debalaben poles estancies como lo que yeren, animes en pena
purgando les sos culpes, más dos tenía munches más que la otra.
La clausura, el calvariu la espera, la
incertidume del alcuentru, el mieu a volar, el martiriu ensin peineta, na más
pueden finar en paz eterna.
Requiescat
in pacem.
No hay comentarios:
Publicar un comentario